Gjafir geta verið í margbreytilegu formi og stundum eru okkur gefnar gjafir sem við gerum okkur ekki strax grein fyrir að séu gjafir en tökum sem sjálfsögðum hlut.  Stundum eru gjafirnar í slíku dulargervi að við áttum okkur ekki á að þakka þær sem skildi – fyrr en ef til vill löngu síðar.
Hvaða gjafir hafa þér verið gefnar í dag? Hvernig var viðmót annarra gagnvart þér? Sýndir þú þakklæti fyrir gott viðmót, þakkaðir þú fyrir hrós sem þú fékkst – eða dattstu í þá gryfju að fara að afsaka þig? … eða þagðir þú bara? Þegar einhver segir eitthvað fallegt við okkur, þá ættum við að taka því fagnandi með brosi á vör eða þakka viðkomandi fyrir. Ef við sýnum engin viðbrögð þá erum við eiginlega að segja að fallegu orðin eða vingjarnlega viðmótið skipti okkur engu máli. Við erum að vanþakka gjöfina sem átti vafalítið að gleðja okkur.

En hvernig er þetta í daglegu lífi þínu, heima og á vinnustaðnum? Ein dýrmætasta gjöfin sem við getum gefið öðrum er að leyfa samferðafólki okkar að finna að það skiptir okkur máli. Við þurfum að gefa okkur tíma til að hlusta á fólkið okkar, sýna því áhuga. Stundum þurfum við líka að læra að þegja. Bara þegja og hlusta, nota virka hlustun – gefa viðkomandi 100% athygli og spyrja svo opinna spurninga sem gefur hinum aðilanum tækifæri til að tjá sig um áhugamál sín eða annað það sem honum eða henni liggur á hjarta.

Okkur væri líklega öllum hollt að fara yfir daginn í dag í huganum, líkt og við værum að horfa á okkur sjálf á kvikmyndatjaldi, þar sæjum við allt sem fram fór í dag frá því að við vöknuðum og þangað til núna. Erum við sátt við það hvernig við komum fram við aðra? Voru þetta góðar gjafir sem við gáfum samferðafólki okkar í dag? Hverju myndum  við helst vilja breyta til betri vegar ef við ættum þess kost?

En  – hvað með þig sjálfa? Hvaða gjafir hefur þú gefið þér í dag? Hvaða tíma gefur þú þér til að skoða hvað þú getir gert fyrir þig? Þú getur lagt þig fram við að hjálpa öðrum, gefa öðrum allt sem í þínu valdi stendur – en ef þú vanrækir að rækta þinn innri mann, gleymir að hlúa að þér og andlegri líðan þinni – þá kemur að því fyrr en ella að styrkur þinn veikist. Ef þú vilt hjálpa öðrum til að blómstra – þá verður þú að byrja í heimagarði, byrja hjá þér, leyfa þér að blómstra. Ef þú vilt strá og dreifa gleði og hamingju til fólksins þíns þá þarftu að haga lífi þínu þannig að þú getir líka náð að blómstra, njóta þess að vera þú.

Allra dýrmætustu og bestu gjafirnar eru ekki endilega þær sem kosta mest í veraldlegum peningum. Sumar gjafir er ekki einu sinni hægt að kaupa en þær byggja samt upp sjálfstraust, hamingju, gleði og innri auðlegð þiggjandans. Í þessu sambandi rifja ég hér upp raunveruleg atvik sem átti sér stað fyrir meira en tuttugu árum síðan. Ég hafði þá nýverið eignast fyrsta gemsann minn og hafði virkjað talhólfaskilaboð þannig að ef ég kæmist ekki til að svara þá gæti viðkomandi talað inn skilaboð til mín. Ég hafði verið við vinnu án símans og sá að í talhólfi gemsans biðu mín tvenn skilaboð.  Þessi skilaboð áttu eftir að grópast vel inn í huga minn og þau sitja þar enn.
Það var barn sem talaði, … ég gat ekki gert mér grein fyrir því hvort þetta var drengur eða stúlka – en mér fannst sem barnið væri svona 4 – 5 – mest  6 ára gamalt. Skilaboðin hljómuðu svona;
“Mamma – þetta er ég, … hérna … – það á að halda upp á afmælið hérna í dag, það er klukkan fjögur, … – og mamma – þú mátt koma, … viltu koma mamma. Bless. “
Mig setti hljóða. En þá voru það seinni skilaboðin. Það var sama rödd, sama barn. “Mamma – þú þarft ekki að koma með neinn pakka – bara koma.”
Þessi skilaboð komu miklu róti á huga minn en það eina sem ég gat gert var að senda út góðar óskir og vona að þetta litla barn fengið þá bestu gjöf sem það gat hugsað sér – það að fá að vera með mömmu sinni á afmælisdaginn sinn. Þetta var ósk um gjöf sem ekki yrði hægt að meta til fjár.
Töpum okkur ekki í að meta gjafir eftir verðmiðunum, gefum raunverulegar glaðir sem gleðja.

 

Með góðri kveðju

Jóna Björg Sætran, M.Ed., kennari, markþjálfi, HAM
www.coach.is
coach@coach.is

 

Mynd: Sharon McCutcheon hjá Unsplash

Höfundur

Jóna Björg Sætran
Jóna Björg Sætran
M.Ed., kennari, ICF markþjálfi, HAM
- starfar við markþjálfun, hugræna atferlismeðferð, námstækni, samtalsmeðferðir, fyrirlestra, kennslu og námskeiðahald.
» Nánari upplýsingar og tímabókanir
  • 8 Posts
  • 0 Athugasemdir (ef einhverar)
M.Ed., kennari, ICF markþjálfi, HAM - starfar við markþjálfun, hugræna atferlismeðferð, námstækni, samtalsmeðferðir, fyrirlestra, kennslu og námskeiðahald. » Nánari upplýsingar og tímabókanir